ANG MAKATA SA PAKIKIBAKA

ANG MAKATA SA PAKIKIBAKA

-  NONI V. QUEANO/27November2010

            “The guerilla is like a poet.”      

                                                -Jose Ma. Sison

Palagi’y kasama ko ang makata

Na tulad ng hangi’y bubugso ng tula

Upang pahupain ang tindi ng araw,

Kahit isang iglap,

Mga pangarap niya’y aking pipitasin’t

Sasamyu-samyuin

Tila ilang-ilang o sampagita,

Na pantawid-loob

Habang binabagtas ang gubat at bundok.

Bangis ng ritmo niya’y

Pansipat sa bala,

Awit ng tula niya’y likidong tutunaw,

Ng panglaw o balisa sa gabi at araw,

Sa parang at gubat

Ang metapora niya ng pakikibaka’y

Bala ng baril ko,

At pusyaw ng pag-ibig niya’y iniisip ko rin

Kung makaulayaw ang masang minahal.

Subalit kung makata’y dilag ko ring sinta,

Papangarapin kong siya’y makapiling

Kahit na sandali,

Mahagkan, mayakap

At maibulong kong bukas paglisan ko’y

Di ako yayao, di magpapaalam,

Tulad ng baril ko at ng kanyang tula,

Hindi matatapos ang paghahanapan.